Telemark folkemusikklag er eit fylkesledd for 16 lokale folkemusikklag i Telemark som til saman har om lag 450 medlemmer. UngFolk er Telemark Folkemusikklag sitt rekrutteringskurs for born og unge, som har blitt arrangert årleg i over 25 år. 

Me legg stor vekt på sosialt samvær og aktivitetar slik at deltakarane kan knytte folkemusikken opp mot eit sosialt nettverk, gjerne på tvers av kommune- og fylkesgrenser. 

Mailen vår er ungfolk@gmail.com

For påmelding, send oss mail med namn, alder, kurs og eventuell erfaring :) 

Kvar er kurset?

Årets kurs er som i fjor på Jønnbu Fjellkyrkje på Lifjell i Bø. Me har eit bygg for undervising, måltid og aktivitetar og eitt bygg der me søv. 

Kvar søv me?

Det er fellesrom med opp til seks stykk saman i køyesenger. Instruktørane har eige bygg, men kursleiarane Andrea og Symre søv på same bygg som deltakarane - og følger med! I tillegg er det ein friviljug vaksen som er sovande nattevakt. Laurdag morgon deler me ut premie til rommet som har vore mest ryddig! (det gjeld oppførsel også...)

Korleis er maten?

Maten er slik du skulle forvente på ein enkel leirskule. På frukosten må alle hugse å smøre lunsjen sin. Kokken vår Ali serverer middag klokka 16. Me set ut til kveldsmat om folk er meir sultne før leggetid (og det er me som oftast). ´

Korleis er undervisinga? 

Me startar dagen med ei felles morgonsamling før me går i grupper- Undervisinga der styrast av instruktørane, som er erfarne med å halde kurs og justere nivå. Me har noko fellesundervisning med song og dans. 

Korleis er fritida?

Bading, bordtennis og boksen går? Teikning, triksing og tralling? Når det ikkje er felles aktivitetar kan ein velje litt sjølv, sett bort frå surmuling og scrolling åleine på rommet...

Symre er ein gitarist, songar og hardingfelespelar frå Morgedal i Vest-Telemark. Ho har bachelor i utøvande musikk frå jazzlina i Bergen og Norges musikkhøgskole i Oslo.